離晒譜孝順仔馬國明

    陳敏之於香閨開直播，揭開視帝馬國明真面目：“離晒譜的孝順仔！”初入行時，已跟媽咪用聯名戶口出糧，無論買衫、買鞋……全部都“媽咪！媽咪！媽咪！”，馬國明解釋：懶得煩啫。

    為爆離晒譜孝順仔的韻事，敏之引爆自己離晒譜的尷尬事。有一次，馬國明放飯時，拿出一個半皮半布的銀包仔，心直口快的敏之彈出一句：“咁醜樣嘅。”原來，這銀包仔正是馬國明媽媽所送的。剛好馬媽媽在場，敏之立即Say Sorry，並即化危為機，“Auntie，我覺得馬明好孝順，媽咪送咩畀佢，或者人家眼中唔靚，但佢眼中都好靚。”馬國明輕描淡寫道：其實，我都係順手。

    訪問視帝，話題不離女人，“我第一次畀咗你！”陳敏之嚇到張大了口，馬國明嘻嘻笑：“這是我第一次網上接受訪問。”他並不諱言，有三位圈中要好的異性朋友，包括拍《下一站彩虹》認識的陳敏之，還有唐詩詠和譚小環。拍劇合作無間的，要數唐詩詠。“白色強人”被狂轟變了“白色蠢人”，指劇中情侶分而合，合而分，網民力斥編導好蠢。兩人最危難最痛苦時候，應該更互相扶持，應立即婚，而非“分”。觀眾忘記了，編導們都有大師癮，仿似“畀你估到，我就唔係周星馳了”。

    “白色蠢人”也出現《奬門人》遊戲中，馬國明自嘲：“我最怕玩辣辣壽司遊戲，我唔係怕食辣壽司，而係怕被人看到我反應慢，個腦轉唔切，成個蠢樣，同劇裡面那精靈醫生角色唔襯。”

    好戲不是一天練成的，“初出道時，儘管好多想法，編導一定對你沒有信心……所以，要忍受得鬧……”馬國明曾經客串藝訓導師，介紹“成帝之路”，其中寶貴一課——“我好多部戲都同Benz雄（許紹雄）一齊拍。我不停問他意見，問到佢煩，用粗口鬧我。但我好記得，有一次佢鬧完我之後，同我講過一句說話：‘你寧願現在我鬧你，還是套劇出街之後，觀眾鬧你？’訝然開竅，圈中前輩都希望新人成長的。電視也許繼承了粵劇的優秀傳統：打我唔緊要，鬧我唔緊要，至緊要係教我。”

    高  梁