盧慧敏拍打戲拉筋辛苦

    無線台慶劇《叠影狙擊》下周播出，Amy（盧慧敏）、Scott（蔡浩然）、娸娸（張凱娸）在劇中有大量動作場面，開拍前按劇組要求三人接受一連串特別訓練。身為動作片初哥的他們，笑言一切從拉筋開始。Amy在劇中首度嘗試飾演奸角，一雙長腿更是她的最強武器，Amy解釋：“劇入面我經常要用隻腳去同人打，主要集中訓練雙腿，但原來踢腿用嘅肌肉，同我平日做運動運用嘅肌肉係唔同，真係要練，有排搞，其中一位師傅好好，不斷鼓勵我。師傅會不斷同你講‘做到口架嘛！你要做甄子丹！’雖然聽落好搞笑，但對我哋嚟講，係一個好正面嘅鼓勵。”

    舞蹈員出身的Scott，是筋骨最柔軟的一個，但卻被導師按在地上進行“深度拉筋”，Scott不斷露出痛苦表情。他說：“我跳開舞都覺得好辛苦，原來打架比我想像中複雜好多，我上完堂返屋企要休息一整日，再用熱水浴腳，條腰勁痛，但我知道娸娸上完堂之後，就連落樓梯都有困難。”娸娸尷尬地笑說：“因為我平時冇做開運動，上完堂之後，我坐低、起身、行樓梯，都會發出痛苦嘅聲音，但其實係好事，學多樣嘢，做演員需要好好裝備自己。”