賢夫慈父親李成昌

    演盡忠奸善惡，百變老戲骨李成昌，已領了無線四十年的敬老金牌。現實只演了一個角色：賢夫！“我忙，老婆又忙，生孩子誰照料，決定不生……。”有晩恩愛，心中一懔，“我有乜三長兩短，誰來照顧我老婆呢？生！”為了做賢夫，後來，才又做了慈父。

    有了生小朋友計劃，李成昌夫婦沒有想過喜歡仔定女。太太產前檢查時，醫生有一個很奇怪的反應，“佢話，唔知講唔講好”。李成昌説，“因為，醫生驚我哋鍾意男仔，尤其是我……當我知道係女。嘩，我哋開心到呀，我唔覺得個女係女，我覺得佢呢一世，係來同我做朋友。我覺得，只要我有能力……，除非係犯法，或者我要去賣當借，我都要令我個女開開心心；我老婆話，佢一定要做奸，一定要來平衡，如果我縱得個女太緊要，咁就慘啦。”

    “女兒十四歲半那年，獨自到英國留學”不捨不捨還得捨，李成昌説，“我同老婆都忙，冇陪個女飛過去。有監護人在那邊機場接佢。好彩現在WhatsApp，隨時可以聯絡……。”

    “好多嘢都預咗，將來個女外國定居，我哋退休便過去探佢囉。”李成昌談及女兒，眉飛色舞，“如果佢返來香港發展，我哋兩公婆仲開心……。就算佢識男朋友係鬼佬，唔緊要，都係這一句——佢來這個世界識到我，我都係想佢開心啫。”

    三年前，李成昌得到服務無線四十年金牌。他説：“我今年就退休，只係數字啫，我點會退休呀。睇公司點同我哋簽囉。早前盛傳TVB同藝員簽一個Show，老就趕人走。我覺得商業社會就係咁，你有知名度就有利用價值，就會畀你好多錢，老闆自有佢一套睇法。”

    李成昌千角演盡，退休之齡，仍戰意昂揚，“再唔係，返內地發展囉，如果有人肯請，唔好講配角，只要個角色好正，我能力能做到，我都會做。”

    還是應了一句，香港娛圈沒有懷才不遇的——現時李成昌仍挑戰從來未演過的角色。新開《凶宅清潔師》演法師；還有另一個未演過的角色，《靈氣逼人》演大老倌。早獲“傑出演員”奬的李成昌，愈近退休愈多挑戰。

    高梁