昨晚賽事總投注二百十二萬

    劉傲起孖迭有佳作

    昨晚沙地賽事完結。是仗跑五場且出馬有限，總投注共收二百一十二萬一千元。

    頭場六班角逐熱頭冷腳。豪廄“盛通精英”由中野省吾操刀出閘快放帶頭，全程一氣呵成走返，贏至對手無力抵擋。“盛通精英”在澳服役跑過多仗未開齋，上次一三五○米跑入三甲。拼後走馬換將再來，今次改配中野省吾執鞭。騎者不負幕後所托，替馬匹打開勝門。謝偉豪訓練此駒交到功課，中野省吾應記一功。

    第二場牌仔劉傲爆冷，贏譚廄“嘉應掌聲”。此雙人馬上次一三五○米跑第七，敗後重整旗鼓再戰。今次原裝配搭轉跑一五一○米，騎者發揮又不同，出閘快步跟前守住三四位，沿途小心翼翼，入直路展開強勁衝刺，埋門擒下對手，替馬匹取得新季首W。跑完獨贏有十四倍，中者好分。劉傲、譚文就攜手添頭馬。

    第三場高君濤贏摩利高廄“獨步天下”。此雙人馬上次短途以無敵姿態取勝，拼後小休增程出擊，今次獨贏熱至得十五元。騎者跑至埋門要同前領馬“夠響廣駿”影相分先後，結果贏個短頭位，大熱門勝出要食驚風散。“獨步天下”今季人馬打疊取得兩W，替高廄添進帳。

    第四場特蘇日勁爆錢廄“馬主聯盟”。此駒一向跑中長途搵食，上次千五米敗後再來，今次用牌仔特蘇日減磅搏殺，獨贏有二十七倍。騎者發揮水準殺至同場強敵一頸血，替馬房建功。錢健明廄增添一W，特蘇日居功。

    尾場牌仔劉傲贏梁國浩廄“聲明鵲喜”起孖食尾餬。此子爆完“嘉應掌聲”手風正順，是場騎“聲明鵲喜”乘勝追擊，憑埋門一步殺上險勝對手，替馬房建功。劉傲近期迭有佳作，繼早前喜中孖寶，今次夜賽又中兩元成績扳升。