放洋苦盡終出頭

    《小花》青春少艾，《堅如磐石》深沉老辣，歲月留痕，陳沖姑成就一段演藝傳奇。

    原生上海，留美學藝，闖蕩荷里活。拍《末代皇帝》敢與大師貝托魯奇拗手瓜：唔剪露點戲，我唔拍！貝公亦冇佢符。

    本外語為學，卻巧進演藝圈，“小花一角非你莫屬！”星探一語成定局，跟手執個熱煎堆，攞埋最佳演員獎。然志不在此，放洋留美，方知世界艱難。去食店捧餐，佢唔怕冇面，老闆卻逢人皆曰：此大明星也！佢則深感有辱國體。苦盡甘來，終有出頭日，於荷里活被認定為繼黃柳霜後之東方演藝女神，奧斯卡有投票權，於今僅佢耳。

    靚女如斯扶搖直上，眾皆生疑。“我冇瞓過導演！”明人快語，坦坦蕩蕩。地下秘撈之作《天浴》卻於金馬獎大殺三方，一家獨贏。女主角呼冤畀賣豬仔，搵A貨拍佢裸戲；沖姑反曰：你都攞咗獎喇！

    若非女強人，何來此傳奇？如今相夫教女，亦升呢亞婆矣！今日乃沖姑六十三齡牛一。

    西門公子