盧瀚霆姊：愛犬係細佬精神支持

    為慶祝Anson Lo（盧瀚霆）生日，其國際後援會昨日舉辦重磅生日活動“Anson Lo Charity Pet Walk”，吸引近四千名粉絲參與，同日更創造“最大規模狗狗掌印展示”世界紀錄，共收集一千○八隻狗的掌印。參與活動的粉絲攜同愛犬參與，活動除了慈善步行籌款活動，場內更有多個打卡位、遊戲及小食攤位，當中亦邀請受惠慈善機構設立攤位，寄望大眾能關注本港不同界別有需要的人士和動物。粉絲接受訪問時說，開心與Anson愛寵Amber互動：“因為都好鍾意寵物，希望透過今次活動可以帶出領養嘅重要訊息，希望一陣我啲狗狗可以同Amber一齊玩得開心啲。”

    昨日Sharon（Anson Lo家姐）與Amber出席活動，並主持起步鳴槍活動，眾多粉絲爭相與Amber影相，成為會場限定打卡點，場面相當搞笑。Sharon感謝粉絲為細佬慶祝生日，盼樂迷繼續為社會弱勢社群付出：“多謝大家愛錫細佬，好開心參與呢日嘅活動！平時Amber都好珍惜同Anson相處嘅時光，因為細佬未必可以日日都陪住佢，早前細佬休養期間，Amber都成為細佬嘅精神支持，成日黐住細佬。平時同Amber落樓散步時，見到細佬啲廣告都會話比Amber知呢個係哥哥，不過佢都好似唔太認得咁。”