誰在    內捲

    近年，每逢大年大節，為咗避開塞滿澳門街嘅人迫人、人推人壯烈場面，我都會去人哋嘅城市，上演反地域嘅人迫人、人推人角色互換。今年農曆年，我就去咗江南五天遊。

    當角色互換由居民變成旅客之後，一切嘅人山人海、你推我撞，又成為熱鬧歡騰嘅城市氛圍。第一晚黃浦江畔，就係喺咁嘅滔滔人浪當中，被響徹雲霄嘅警鳴哨子之聲吸引，人潮靜止於過馬路前嘅路口，大家都觀賞住呢場充滿律動節奏、軍操式人肉武警交通放行指揮陣表演。剎那間我想，如果呢個場面換轉喺大年大節、人潮鼎沸嘅新馬路，又會係如何一番光景。

    今次江南行，連續遇到嘅幾件事，我都覺得值得反思、深耕一下。

    事件一    自助早餐

    喺高級啲嘅酒店食自助式早餐，想飲咖啡係唔使自己動手，會有服務員攞過嚟，呢啲已經係常態，但係食食下有個師傅托住盤麵包逐枱問：“這麵包是剛出爐的，請問客人要嘗一嘗嗎？”咁我就真係見識少，未遇過。自然，有新鮮出爐麵包，就會有其他美味陸續登場，只見另一位師傅托住盤日式燉蛋行到我面前，問我：“客人想試一下嗎？”如果唔係要趕集合，真係想數下仲會有乜排隊出場。

    正當攞住水壺想斟水帶走之際，有位似係經理嘅仁兄問我：“客人要裝水帶走？可以幫客人你泡一壺紅茶嗎？這茶只會裝至八分滿，到客人喝的時候，再加一點涼水就不怕會燙着了。”

    我仲未同佢講多謝，佢已經緊接問我：“要不要多帶一杯咖啡，剛才有留意到客人有飲咖啡……”

    事件二    無錫榮氏梅園

    農曆年夠膽返祖國同各路同胞一較高下，拼個血濃於水，當然就會預咗周圍都係密密麻麻嘅人頭，梅園又點會例外。

    好彩眼明手快，見到一架未有載客嘅十二座電瓶車，大家二話不說就跳上去。司機小哥話每位收費十五大元人仔，自是喜出望外。同小哥講，我哋有一小時遊園時間，佢好熱情咁講：“沒問題，定準時把你們送回來，絕不耽誤。”

    今次遊園雖未遇見杜麗娘同柳夢梅，亦辜負了含苞未放、以“為天下布芳馨”為宗旨嘅梅林盛宴，但小哥所經之處，盡詳說不怠。快樂時光總跑得快，自開原寺步出，距集合時間只剩十幾分鐘，小哥知道後說：“為天下布芳馨沒事，我飆車把你們送回去……”結果，集合前三分鐘趕到。

    同小哥分別嗰陣，佢話梅園十天後花林如海，定要再訪，到時再帶我哋去睇其它景點。同呢位笑意盈盈、用誠意對待自己份工嘅小哥講再見嗰陣，真係有啲不捨，因為佢實在可愛。

    （二之一）

    淡    如