衝出香港夢想成真

    馮允謙澳門騷全場爆滿

    馮允謙(Jay)首度衝出香港開騷，日前於澳門倫敦人綜藝館舉行《the SOUNDTRACK of my LIFE馮允謙演唱會澳門站》，全場爆滿。Jay獲媽媽、孖生細佬Tim及圈中好友“頭號追風”劉沛蘅、黃正宜、陳考威和未婚妻陳穎欣等前來澳門捧場。

    Jay以七彩閃片長褸型格出場，他邊彈結他邊唱《尋找隱世巨聲》、《A New Day》和《入場人士注意》為演唱會揭開序幕。Jay向觀眾打招呼後感激表示：“今次嚟到澳門開騷，對我嚟講係夢想成真，因為我冇諗過可以喺呢個舞台唱歌畀你哋聽，多謝你哋畀機會我衝出香港。”全場報以熱烈掌聲。

    演唱會上，Jay鳴謝團隊後感性分享說：“入咗行一段時間，我嘅演藝路上未必好順利，但我好幸運，隔咗一段時間終於可以開騷，我真係估唔到可以嚟到澳門開騷，我知道好多香港或者其他地方嘅朋友特登嚟支持我，多謝你哋，希望我哋可以好快再見。”隨即響起《會再見的》前奏，全場燈海場面感人。演唱會尾聲，Jay坦言希望自己的歌曲可以陪伴大家，成為大家的人生之歌，並以《在最好的時間做最好的你》兼全場大合照作結，演唱會圓滿結束。

    完騷後Jay接受訪問時難掩興奮，說：“觀眾反應好熱烈，真係冇得頂，好想多謝佢哋。今次衝出香港開騷係夢想成真，開完紅館隔咗一段時間嚟澳門，見到反應咁好，畀咗好大信心我，希望可以將依個騷帶去唔同地方，令更多人睇到。”觀眾的熱情讓他盡情放膽演出，他說：“今次比起紅館三場演唱會更輕鬆，感受到觀眾嘅溫暖同愛，好似一班朋友聚會同唱歌，令我壓力減低。”

    另外，Jay為答謝粉絲，完騷後專誠走到場館外，與數百位不願離開的粉絲道謝，並與他們一起合照，Jay果然是寵粉天花板。