拍《光明大押》再度合作

    呂爵安得謝君豪傾囊相授

    ViuTV原創劇《光明大押》於昨日起播，逢周一至周五晚九時三十分播映。劇集講述一位老字號當舖的駐店二叔公，集百家辨別真偽絕學於一身，由於老闆夫婦早逝，他肩負起照顧老闆一對兒女的責任，三人本來關係親密，但卻因一事而疏遠。

    MIRROR成員呂爵安(Edan)於劇中飾演當舖太子爺關俊，是一個很聰明的人，自小與練美娟（娟姐）飾演的姊姊關聆一同被謝君豪（豪哥）飾演的當舖二叔公林定堅照顧，彼此間有種奇妙的關係，曾經熟悉過、溫馨過，同時卻又有些傷疤。Edan為大家介紹關俊：“佢喺i-Bank度做野，同時亦面對緊人生嘅一啲抉擇，一句我喺劇入面成日講嘅就係‘揀揸跑車定係揀行路呢？’，究竟要為咗錢、名利不擇手段，定係甘願過一個普通嘅人生。”他認為關俊最特別之處是身邊有很多不同的人：“無論係職場、女朋友，定係返到屋企對住堅叔定家姐，都係唔同嘅感覺。我覺得呢個係今次角色比較好玩嘅地方，因為佢可以有好多唔同嘅經歷。”

    呂爵安直言今次最開心是可以跟豪哥再度合作：“上一次合作已經係電影《過時 · 過節》，那時嘅自己好緊張，同埋都好少拍攝經驗。當時豪哥幫咗我好多，佢好鼓勵我，亦會傾囊相授，佢真係將佢識嘅野都會慢慢同我分享。”他又談到與其他演員的合作：“娟姐都係第二次合作，第一次係劇集《大叔的愛》。再合作嘅感覺都幾好笑，我同佢好多場口都會互相引大家笑，係幾好玩嘅。然後仲有Fish（廖子妤），係第一次合作，都知道佢係一個好犀利嘅演員，所以之前都好期待同佢合作嘅火花。”