陳家樂自爆追女百發百中

    結婚兩年的陳家樂和連詩雅，由兩口子變成三口之家。詩雅產後工作忙個不停，除了唱歌、主持，還踏足舞台劇界。老婆過足戲癮，家樂亦不讓老婆專美，踩過界為網上平台主持新節目《巴打圍爐The Bros Club》，更自爆追女仔百發百中。

    家樂在首集節目中，獲其他主持人狂笠高帽，稱讚他既靚仔，又是男主角、老婆靚、家庭又幸福，是人生勝利組；家樂則謙虛道：“我諗勝利係你哋誤會咗我，可能係既定印象，未真係了解我就話我勝利。”提到家樂靚仔有利追女仔，家樂耍手擰頭謂：“有好多人都好靚仔，我係普通靚仔，亦唔係我話想要邊個，就可以要邊個嘅；不過又真係好少有追唔到女仔嘅經驗，因為我要有十足把握才會出手。”

    節目中，家樂大讚老婆連詩雅對他非常遷就，兩公婆甚少鬧交。談到人生低潮期，家樂竟表示現時活在辛苦中：“可能好多人覺得我好多嘢做，我能力未必可以畀我選擇做或唔做，又唔知自己嘅選擇啱唔啱，譬如今年我放低咗一啲工作，但收入就減少，冇咗呢啲錢，點照顧屋企。”而家樂最希望演技獲認同，有其他突破。