斯文殺手羅渣哥

    007鐵金剛係持牌殺手，奉旨殺人。然竟有如此斯文幽默者，史上僅此一個，乃羅渣摩亞。一九七三年，佢首演007系列第七部《勇破黑魔黨》，一反前任辛康納利殺殺殺，佢殺得斯文幽默。好一個紳士占士邦，贏得忠粉無數。此片亦紅了珍茜摩爾，乃至後有《時光倒流七十年》而成經典。

    羅渣哥乃父係差佬。佢細時想做藝術家，陰差陽錯，二戰參軍，服役情報部門，已算半個007。演占士邦，佢有名言：“係人都知007係間諜，個個知你飲馬天尼要搖唔要搞，仲間乜鬼諜！不如間得幽默啲。”

    七部邦片，羅渣哥係最紳士一個。銀幕上風流倜儻，殺人也斯文；現實中有人話佢係真英雄。佢與柯德莉夏萍同任聯合國兒童基金會親善大使，乃聯合國一對金童玉女。佢得獎無數，事頭婆亦封佢爵士。早年曾攜妻到北京探愛滋病孤兒。

    八年前今日，羅渣哥癌殁，齡八十九。

    西門公子