黃淑蔓新歌MV毒殺渣男

    黃淑蔓(Feanna)形象一向活潑開朗，充滿正能量，但在新歌《未至於》MV來個大反轉。她飾演有“愛情潔癖”的女主角，發現被男友背叛後老羞成怒，以極端方式復仇。“渣男”由Feanna的好朋友、網紅“波仔”(Boris)飾演，Feanna出道不久就認識年齢相約的Boris，一齊拍視頻，老友鬼鬼。Feanna說：“大家都知Boris成日幫其他人拍MV做導演，做男主角係第一次，仲為咗嚟拍MV調動其他工作嚟做渣男，我好感動。”

    《未至於》由張天穎作曲、黃偉文填詞、蘇道哲編曲和監製。Feanna說：“我最初因為歌名叫《未至於》加上歌詞有啲Sad，我就當咗佢喺首傷心嘅歌嚟唱，結果出嚟效果唔理想。後來我聽聞Wyman寫詞嘅時候諗到‘小丑女’之後，我決定笑住嚟唱，就成為依家呢個版本。”

    導演與拍攝團隊花盡心思，除了Feanna佈局向渣男復仇手法特別，家裏的裝飾、她每個小動作都精心設計，暗藏伏線。而MV結局，Boris品嘗Feanna為他烹調的最後晚餐，然後只有一套衣服在泳池中漂浮，Feanna捧着紅酒杯露出邪惡的微笑，讓觀眾心領神會。