朱栢康演員路背後有汗

    剛奪得金像獎最佳男配角的朱栢康又有新搞作，他拍攝的男士服裝品牌廣告剛剛上線。朱栢康在廣告中大騷Fit爆身形，為“演員路”不時操練，仲話“流過幾多汗，觀眾未必知，但我自己知道。背後有汗，有痛，有無數次重來。”

    雖然榮升金像獎男配得主，朱栢康就話自己冇“藝人包袱”，平時喜歡以簡約配搭示人：“因為拍戲就會有戲服，所以平時都好簡約，一件恤衫比人感覺斯文、有活力就可以，始終成長後都唔可以太求其。我試過有次做完運動突然要去試鏡見導演，本身得件背心、牛仔褲，好在車尾一直都有擺件恤衫傍身，咁就簡約得嚟唔失禮。”朱栢康笑言着衫自信都很重要，依家揀衫都有心得：“以前着衫真係好簡單，舒服至上，但近年去多咗隆重場合，依家都識得因應不同場合揀啱嘅衫着。”

    問到攞奬後有甚麼慶祝活動，他說：“可能嚟緊會同啲朋友食吓飯慶祝，但都要收拾心情投入劇組。攞獎後希望拍多啲廣告，多啲贊助吓啲裇衫，因為藝人買衫其實都花費好大。”