風流武俠獨臂刀

    《獨臂刀》當今世上只公認一人，就係王羽。當年王公一片成名，救返港產武俠片。乃師張徹憑此片創港片新武俠浪潮，殺出血路，王公亦成新浪潮首俠。俟後港片武風大盛，吹遍全球。

    王公、古龍份屬老友，亦同係劉伶兄弟，可通宵共飲，翌晨齊去醫院吊針。龍哥仙遊之日，一眾好友投其所好，四十七瓶XO隨葬。然又怕先人未飲酒已被盜，索性靈堂之內龍體之旁，一眾兄弟開懷盡飲，以示送行。

    有段婚姻，曾一時轟動。叔父講古，功夫佬明追秦劍老婆林翠，雖女長男幼，且其夫尚在人間，佢一於少理。卒之人夫自盡，屍骨未寒，功夫佬翌日即宣佈結埋連理，如斯直接，真冇佢符。

    王公生活多彩之極，身邊靚女如雲，成大哥老婆亦曾有傳聞。王公自爆另位林美人曾追佢，惟自知底有黛色，怕影響美人前途，忍痛割席。三年前王公駕鶴，今日乃八十三歲冥壽。

    西門公子