音樂會上送專輯冧粉絲

    Lolly Talk翻唱Twins金曲響頭炮

    首場《The Singleton Just Sing Live in Wonderland》已於三月八日，假AXA x WONDERLAND順利舉行。首日大會邀請人氣創作歌手陳凱詠(JACE)、網絡型男周殷廷(YT)、人氣女團Lolly Talk為音樂會打響頭炮！

    女團Lolly Talk這晚全部成員身穿短裙出場表演，現場粉絲即時血脈沸騰、興奮歡呼拍掌。眾成員即時獻唱多首經典女團歌，並表示：“我哋好鍾意Twins，《明愛暗戀補習社》係佢哋第一首歌，可以翻唱佢哋啲歌係驚喜！（練佢哋側手翻？）我哋有同排舞師講過，但要時間練吓先，依家唔敢獻醜住，平時我哋唱K都會唱女團啲歌，今次舞台上演出真係好開心！”之後，她們在台上即席考粉絲，並即時送出四張專輯氹樂迷，然後叫全場亮起手機伴唱，搞到Lolly Talk眼濕濕！

    而陳凱詠粉絲同樣熱情，短裙配長靴出場演唱，還在台上飲酒助興。她說：“其實我咩情況都會飲酒，因為養聲最主要係識保護聲帶、飲多啲水，但係開心反而緊要啲。我見啲外國歌手成日會唱兩句、飲兩啖，一直都好想試吓，所以頭先試咗啦，聽到台下大叫飲杯！”

    JACE笑指聽到大家問何時開個唱，但現在以推出新歌為主，仲話想儲多啲快歌成為“獨立跳唱”歌手。

    周殷廷壓軸出場，他表示好鍾意戶外騷，所以唱到第二首歌已行落台握手，粉絲不斷瘋狂尖叫，佢又十分體貼親民，仲來者不拒跟粉絲自拍！雖然粉絲要求“除衫”，但周殷廷就話唔好，但仍坐在台前，超近距離唱歌，氹到粉絲好開心。