鬼才導演夠破格

    幾部電影，部部名留青史，響噹噹大師如史笏堡，亦要叫佢師傅。荷里活有此奇人，禀賦超前，我行我素，玩死電影老行尊。此公雖屬反斗一族，然所創黑色幽默，卻為後世圭臬。

    史丹利寇比力克，上世紀六十年代拍《2001太空漫遊》，史無前例。叔父曰，當年同學仔睇完，個個想做太空人。於無電腦年代，拍得如斯太空，無怪乎史笏堡五體投地，喻為史上“最偉大電影”。

    五十年代拍《光榮之路》，首創用攝影穩定器逆拍追蹤長鏡頭，成電影學院教學範例。年前電影《1917》，則據此學而優。佢拍《一樹梨花壓海棠》、《大開眼戒》，情色與色情，坊間媽聲四起，史公一於懶理，激壞影壇叔父。

    《發條橙》搞到社會嘈隆隆，正耶邪耶，是耶非耶，於今亦然。佢話戲中人要暈，索性將攝影機從樓頂丟落，乜都敢死。有理冇理，此片亦已成經典。

    廿六年前今日，史公登仙，齡七十一。

    西門公子