彩排拗柴紥腳上台

    蔡一傑帶傷來澳落力演唱

    上周六，草蜢三子蔡一傑、蔡一智、蘇志威來澳在威尼斯人金光綜藝館開唱，雖然蔡一傑彩排時拗柴要紥腳演出，但負傷上陣的他照打後空翻。草蜢在三個小時的演唱會無間斷地賣力跳唱，蔡一傑更狀態大勇表演後空翻。但臨近尾聲，他才透露，前一晚彩排跳舞唔小心拗傷左腳。

    談到成軍卅八年，蔡一傑感觸說：“一隊組合喺樂壇卅八年，除咗大家要一直維繫住好好嘅關係，大家仲要一樣咁fit，先可以做到今時今日，所以呢條路一啲都唔容易行。”蔡一智接着說：“草蜢到而家，應該達成咗五百多個夢左右，仲有好多夢可以繼續實踐，希望大家將來喺任何媒體上見到我哋，會諗起香港有一隊三人組合叫做草蜢。”之後三子跳唱第一首主打歌《飛躍千個夢》，獲全場跟着跳唱。

    談到傷勢，蔡一傑說：“夜晚返到酒店房，阿智仲話做跌打師傅幫我扭吓隻腳，我即刻話唔好，唔慣畀阿哥捽腳，但我有幫自己按摩。其實今晚要用繃帶固定腳踭位置才能演出，不過現場太好氣氛，我根本都忘記咗受傷，觀眾嘅掌聲同歡呼聲，係最好嘅止痛藥。”

    身旁的蘇志威說：“其實我好放心佢嘅傷勢，因為我哋三個都係超級運動員，少少損傷，一日應該可以復原，冇問題。”蔡一智則準備了親自設計的T恤回饋澳門粉絲的支持，逗得觀眾大搶禮物包。

    完騷後蔡一傑公佈喜訊，指獲某頒獎禮頒發“十大健美名人獎”，得到一座九九九點九千足純金獎座及獎牌。一向努力做運動的他希望，能keep住六嚿腹肌。蘇志威和蔡一智恭喜過他，打趣稱他們在健身方面“行錯路”，只能獲得“十大排骨名人獎”。 草蜢又指，此行提早了數天到澳門做準備，感激經理人和粉絲買來大量美食，令酒店房變成了一個小型澳門美食天地。