盧凱彤（Ellen）和林二汶的at17今年重組，將於本月二十二至二十四日在伊利沙伯體育館舉行「Girls Girls Girls演唱會二０一七」，昨日發放新歌《18》MV，當中Ellen和林二汶全裸上陣，相當震撼！MV由Ellen老婆余靜萍執導，只有她們三人在酒店房內拍攝。而一手湊大at17的黃耀明、周耀輝、蔡德才和于逸堯更在新歌中唱了一句，令歌曲別具意義，二汶話聽到毛管戙。 《18》MV表達成長和蛻變，二汶說：「我和Ellen都過咗三字頭，已經唔再青澀，自從Solo之後，我哋都大個咗，就好似踏入十八歲，成年啦，要為自己負責，可以做自己想做嘅事，呢個階段都幾得意！」MV裏二汶全裸露背、Ellen全裸僅以雙手遮掩重要部位，她們的紋身都清楚可見。還有乳齒、塗指甲酒、蝴蝶翅膀、新娘頭紗等畫面，都有蛻變和成長的寓意。 而一手湊大at17的黃耀明、填詞人周耀輝、音樂人蔡德才和于逸堯在《18》中發聲支持，當中周耀輝更是第一次錄音，很有紀念價值。二汶說：「呢首歌裏面出現咗呢四個男人嘅聲音，佢哋對我哋好重要，係湊大我哋嘅人，由佢哋唱『靈魂直至骨肉』非常貼切，我哋聽到毛管戙！」◇ |
